«Bavariya» rahbari Gerbert Xayner Maykl Olisening kelajagi haqida fikr yuritdi. Fransuzlik vinger Myunxen grandi tarkibida dunyoning eng yaxshi futbolchilaridan biriga aylandi. Mish-mishlar futbolchini doimiy ravishda Angliyaga qaytishi mumkinligi bilan bog‘lamoqda, shuningdek, Yevropaning boshqa top-klublari tomonidan bo‘layotgan qiziqishlar haqida ham gap-so‘zlar yuribdi.
«Biz Oliseni mutlaqo o‘z safimizda saqlab qolmoqchimiz. Uning shartnomasi 2029 yilgacha mo‘ljallangan. Maykl top-darajadagi jamoada o‘zini ko‘rsatish imkoniyatiga ega bo‘lgach, aql bovar qilmas darajada o‘sishga erishdi. Bizning hujum chizig‘imiz juda kuchli — kamdan-kam klublar bunday hujum vakillari bilan maqtana oladi. Bu ham Olisening foydasiga ishlaydi. Bu yerda u har mavsumda barcha sovrinlar uchun kurasha oladi. Men uning vaziyatida jamoadan ketish haqida o‘ylashga hech qanday sabab ko‘rmayapman», — dedi Xayner Sport Bild nashriga bergan intervyusida.
Shanba kuni «Bavariya» Germaniya Kubogi finalida «Shtutgart»ga qarshi maydonga tushadi. Bundan avval Vensan Kompani shogirdlari Bundesliga chempionligini qo‘lga kiritishgan edi.
