«Барселона» футболчиси Гави бўлажак Чемпионлар Лигаси финалида нима учун «ПСЖ»га ғалаба тилаётганини очиқлади. Парижликлар бош соврин учун кечадиган ҳал қилувчи жангда Лондоннинг «Арсенал» клуби билан тўқнаш келишади. Баҳс 30 май куни Будапештда бўлиб ўтади.

«Дембеле мен учун худди акамдек, буни доим айтаман. Биз жуда кўп гаплашамиз, у менинг яқин дўстим. Ҳозир у ажойиб спорт формасида ва у яна бир бор Чемпионлар Лигасида ғолиб чиқади деб умид қиламан. Шунингдек, Луис [Энрике] ва Фабиан [Руис] учун ҳам хурсанд бўламан. «ПСЖ» таркибида испанияликлар кўп, аммо мен айнан Усмонни алоҳида қўллаб-қувватлайман. Унинг «Барса»дан кетишини қабул қилиш мен учун оғир бўлганди, лекин ҳозир унда ҳаммаси яхши эканлигидан хурсандман», – деди Гави.

«Барселона» Чемпионлар Лигасидаги иштирокини 1/4 финал босқичида «Атлетико»га имкониятни бой берган ҳолда якунлаган эди.