Апрель ойининг охирида «Манчестер Сити» марказий ҳимоячи Жон Стоунс жорий мавсум якунида жамоани тарк этишини расман эълон қилган эди. Футболчининг ўзи «шаҳарликлар» либосидаги сўнгги ўйини олдидан ўз ҳиссиётлари билан ўртоқлашди.
«Футболда клубларни ўзгартириш — спортнинг бир қисми, бироқ бу ерда ўтказган ўн йилим давомида мен ҳақиқий дўстлар орттирдим. Мени танийдиган инсонлар бу клубни қанчалик яхши кўрганимни ва ҳали ҳам яхши кўришимни тушунишади. «Вилла»га қарши ўйинда мен хайрлашмайман, бу шунчаки: «Тезда кўришгунча», дегани бўлади», — дея ҳимоячининг сўзларидан иқтибос келтиради The National News нашри.
Стоунс инглиз клуби сафига 2016 йилда «Эвертон»дан ўтган эди. «Манчестер Сити» таркибида 31 ёшли ҳимоячи 294 та учрашувда майдонга тушиб, ўз ҳисобига 19 та гол ва 9 та голли узатмани ёздириб қўйган. Сешанба куни Стоунс жамоаси сафарда «Борнмут»ни мағлуб эта олмади (1:1) ва бу натижа «Арсенал»нинг муддатидан олдин Англия Премьер-лигаси чемпионига айланишини таъминлади.
