«Бавария» президенти Герберт Хайнер «Реал» клуби Мюнхен жамоасининг иқтисодий моделига ҳавас қилиши ва ундан ўрнак олишини маълум қилди.

Шанба куни, 23 май куни «Бавария» Германия Кубоги финалида «Штутгарт»га қарши майдонга тушади. Бундан аввалроқ мюнхенликлар жорий мавсумда Бундеслига чемпионлигини қўлга киритишган эди.

«Чемпионлик унвони доимо биз учун бош устувор вазифа бўлиб келган. Албатта, «олтин дубль» (бир мавсумда ҳам чемпионат, ҳам кубокни ютиш) торт устидаги олчадек гўзал иш бўларди. Биз ўз футболимиз билан одамларни ҳайратда қолдирмоқдамиз. «Реал» ва «ПСЖ»га қарши учрашувларда бутун дунёда, ҳатто одатда «Бавария»га мухлислик қилмайдиган инсонлар томонидан ҳам эътирофга сазовор бўлдик.

Клубимиз ажойиб ҳолатда ва халқаро стандартларни белгилаб бермоқда. Чемпионлар лигаси ўйини олдидан Мюнхенда бирга тушлик қилганимизда, «Реал» вакиллари ўзлари ўрнак оладиган ягона клуб борлигини ва бу «Бавария» эканлигини айтишди. Биз ташқи инвесторларга қарам эмасмиз», — деди Хайнер Sport Bild нашрига берган интервьюсида.