«Барселона»нинг ҳужумкор ярим ҳимоячиси Фермин Лопес ўнг оёқ кафт усти бешинчи суягининг синиши туфайли жарроҳлик амалиётини бошдан кечирди. Футболчи ўз ижтимоий тармоқлари орқали ёзда бўлиб ўтадиган жаҳон чемпионатида Испания терма жамоаси сафинда майдонга туша олмаслигини маълум қилди ва бу борадаги ўз ҳиссиётлари билан ўртоқлашди.

«Операция яхши ўтди ва мен аллақачон ҳам жисмоний, ҳам руҳий жиҳатдан янада кучли бўлиб қайтиш ҳақида ўйлаяпман. Ҳаёт ва футбол сен умуман кутмаган ёки бунга лойиқ бўлмаган пайтда шафқатсизлик қилиши мумкин, бироқ буларнинг барчаси йўлнинг бир қисми эканлигини қабул қилиш керак», — дейилади Лопеснинг хабарида.

Жорий мавсумда испаниялик хавбек «кўк-анорранглилар» либосида 48 та учрашувда қатнашиб, ўз ҳисобига 13 та гол ва 17 та голли узатмани ёздириб қўйди. Эслатиб ўтамиз, мундиалнинг гуруҳ босқичида испанияликлар Кабо-Верде, Саудия Арабистони ва Уругвай терма жамоаларига қарши баҳс олиб боришади.