«ПСЖ» ҳужумчиси Усмон Дембеле яна бир бор «Олтин тўп»ни қўлга киритиш истаги борлигини маълум қилди.
Франциялик футболчи 2025 йилда France Football талқинига кўра йилнинг энг яхши футболчиси деб топилган эди.
«Марсель» ҳамда Франция терма жамоаси собиқ футболчиси, 1991 йилги «Олтин тўп» соҳиби Жан-Пьер Папен ватандошига савол билан юзланди: «Ушбу ажойиб «ПСЖ» жамоасида сенда ушбу совринни («Олтин тўп»ни) иккинчи марта ютиш имконияти бор. Мен шунчаки билмоқчи эдим: бу совринни нима қилиб бўлса ҳам қўлга киритиш сенинг бош устувор вазифангми?»
«Уни бир марта қўлга киритганингиздан кейин, яна кўп марта ютишни хоҳлаб қоласиз, лекин мен, шубҳасиз, жамоани биринчи ўринга қўяман.
Энг муҳими — Чемпионлар лигасида ғолиб чиқиш. Шунингдек, менинг калламда узоқ вақтдан бери айланиб юрган яна бир мақсадим бор, у ҳам бўлса Франция терма жамоаси билан ажойиб жаҳон чемпионатини ўтказиш. Кейин эса кўраверамиз», — деди Дембеле.
