«Барселона» клуби Миланнинг «Интер» жамоаси марказий ҳимоячиси Алессандро Бастони трансферидан воз кечишга мажбур бўлди. Клублар футболчини бутунлай бошқача баҳолашаётгани сабабли ушбу келишув тўлиқ «музлатилди», дея тасдиқламоқда инсайдер Фабрицио Романо.

«Нерадзуррилар» Бастонини фақатгина «жуда манфаатли» таклиф тушган тақдирдагина сотиш имкониятини кўриб чиқишга тайёр эди, «кўк-анорранглилар» эса ушбу трансферни 45-50 миллион евро эвазига ҳал қилишни режалаштирганди.

Манбанинг таъкидлашича, каталонияликларда 27 ёшли футболчини бундай нархга сотиб олиш учун ҳеч қандай имконият йўқ эди. Transfermarkt баҳосига кўра, Алессандро Бастонининг бозор қиймати 70 миллион еврони ташкил этади. Италиялик ҳимоячининг «Интер» билан амалдаги шартномаси 2028 йилнинг ёзига қадар мўлжалланган.