«Ювентус» марказий ҳимоячиси Глейсон Бремернинг номи яна Англияга кўчиб ўтиш билан боғланмоқда.
29 ёшли футболчига «Манчестер Юнайтед» ва «Ливерпуль» клублари қизиқиш билдирмоқда, дея хабар бермоқда Transfer News Live нашри La Gazzetta dello Sportга таяниб.
Агар «бьянконери» жорий мавсум якунларига кўра Чемпионлар лигаси йўлланмасидан маҳрум бўлса, бразилиялик ҳимоячи жамоадан кетиш имкониятини жиддий равишда кўриб чиқиши мумкин.
Лучано Спаллетти қўл остидаги жамоа А Сериянинг сўнгги тури олдидан турнир жадвалида олтинчи ўринни эгаллаб турибди. Глейсон Бремернинг Transfermarkt сайтидаги трансфер баҳоси 35 миллион еврони ташкил этади. Марказий ҳимоячининг «кекса синьора» билан амалдаги шартномаси 2029 йилга қадар мўлжалланган.
