Тажрибали ярим ҳимоячи Даниэль Парехо «Вильярреал»ни тарк этмоқда. Бу ҳақда Испания клуби матбуот хизмати хабар берди.
37 ёшли хавбек «сариқ сув ости кемаси» таркибида олти мавсумни ўтказди. Парехо Испания жамоаси сафида жами 269 та ўйинда иштирок этиб, 16 та гол урди. Даниэль «Вильярреал» билан биргаликда Европа Лигаси ғолибига айланган, шунингдек, Чемпионлар Лигаси ярим финалигача етиб борган эди.
Испания чемпионатининг жорий мавсумида «Вильярреал» турнир жадвалида тўртинчи ўринни эгаллаб турибди. Якуний тур олдидан жамоа ҳисобида 69 очко мавжуд. Клуб қўшимча кўрсаткичлар бўйича учинчи ўриндаги Мадриднинг «Атлетико» жамоасидан ортда қолмоқда.
