Аввалроқ «Саутгемптон» клуби рақибнинг машғулотларини яширинча кузатгани сабабли Чемпионшип плей-офф босқичидан четлаштирилган эди. Mirror нашрига маълум бўлишича, «Манчестер Юнайтед» ушбу вазиятдан унумли фойдаланиб қолиши мумкин — клуб «авлиёлар»нинг 22 ёшли ярим ҳимоячиси Ши Чарльзга қизиқиш билдирмоқда.

Қайд этилишича, айни дамда «қизил иблислар» «Саутгемптон» атрофида содир бўлаётган воқеалар ривожини диққат билан кузатиб боришмоқда. Ши Чарльз — «Манчестер Сити» академияси тарбияланувчиси ҳисобланади. У «Саутгемптон» сафига 2023 йилда келиб қўшилган эди. Жорий мавсумда таянч ярим ҳимоячиси барча турнирларда 38 та учрашувда майдонга тушиб, ўз ҳисобига 6 та гол ва 2 та голли узатмани ёздириб қўйди. «Transfermarkt» портали экспертлари Чарльзнинг трансфер қийматини 12 миллион еврога баҳолашмоқда.