Яқинда Лондоннинг «Арсенал» клуби 2004 йилдан буён илк бор Англия чемпионига айланди. «Канонирлар»нинг ушбу муваффақиятини таниқли собиқ футболчи Пол Мерсон шарҳлаб ўтди.

Мавсум давомида Микель Артета жамоаси ҳаддан ташқари прагматик футбол ўйнагани ва томошабоплик етишмагани учун тез-тез танқид қилиб турилди, бироқ Мерсоннинг фикрича, айнан мана шундай услуб лондонликларга орадан 22 йил ўтиб, Англия Премьер-лигасининг олтин медалларини қўлга киритиш имконини берди.

«Мен улардан жозибадор футбол ёки рақибларни тўрт-беш та тўп фарқи билан мағлуб этишларини кутмаган эдим. Чунки кетма-кет уч йил иккинчи ўринни эгаллаганларидан кейин, бу сафар лигада ғолиб чиқиш учун жамоа устида ишониб бўлмас даражада катта босим бор эди. Улар маълум бир услубда ўйин кўрсатишди ва бу ўз мевасини берди — улар чемпионликни қўлга киритишди», — дея экспертнинг сўзларидан иқтибос келтирмоқда «Sky Sports» нашри.

Эслатиб ўтамиз, «Арсенал» жорий мавсумда яна бир совринни қўлга киритиши мумкин. Шанба куни, 30 майда Англия клуби Чемпионлар лигаси финалида «ПСЖ»га қарши майдонга тушади.