«Барселона»нинг нидерландиялик ярим ҳимоячиси Френки де Йонг шу ёзда фаолиятини бошқа клубда давом эттириш вариантларини кўриб чиқиш-чиқмаслиги ҳақидаги саволга жавоб берди. Хавбек 2019 йилнинг ёзидан буён «кўк-анорранглилар» шарафини ҳимоя қилиб келмоқда.
Жорий мавсумда де Йонг клуб миқёсида 37 та ўйинда майдонга тушиб, 1 та гол урди ва 8 та голли узатмани амалга оширди.
«Мен шу ёзда «Барса»дан кетмайман. Ҳатто хаёлимга ҳам бундай фикр келмаган», — дея де Йонгнинг сўзларини келтирмоқда X ижтимоий тармоғидаги The Touchline нашри.
Френкининг «Барселона» билан амалдаги шартномаси 2029 йил июнь ойи охиригача мўлжалланган. Transfermarkt портали ярим ҳимоячининг бозор қийматини 45 миллион еврога баҳоламоқда.
