«Арсенал» бош мураббийи Микель Артета матбуот анжуманида ўз жамоасининг чемпионлиги ҳақида қандай хабар топганини сўзлаб берди.
Маълумки, сешанба куни «Манчестер Сити» «Борнмут» билан дуранг (1:1) ўйнаганидан сўнг, «Арсенал» АПЛ турнир жадвалида пешқадам сифатида етиб бўлмас даражага кўтарилди ва чемпионликни нақд қилди.
— «Борнмут» - «Манчестер Сити» учрашувини кўрдингизми?
«Мен кўчага чиқиб, боғда олов ёқдим ва барбекю пиширишни бошладим. Ҳеч нарсани кўрмаётган эдим. Лекин меҳмонхонадан шовқин эшитилаётганди. Бир пайт катта ўғлим боғ эшигини очиб, ёнимга югуриб келди, мени қучоқлади ва: «Биз чемпионмиз, дада!» — деб айтди», — деди Артета.
«Арсенал» орадан 22 йил ўтиб илк бор Англия чемпионига айланди. Премьер-лиганинг сўнгги турида «канонирлар» «Кристал Пэлас»га қарши майдонга тушадилар.
