«ПСЖ» ҳужумчиси Усмон Дембеле жамоа бош мураббийи Луис Энрикени мақтади. Француз футболчиси испаниялик мутахассис қўл остида ўтган мавсумда ҳақиқий юксалишни амалга оширди.

Эслатиб ўтамиз, ушбу форвард 2025 йилнинг кузида «Олтин тўп» совринини қўлга киритган эди, жорий йилнинг 30 май куни эса парижликлар билан биргаликда кетма-кет иккинчи бор Чемпионлар лигасида ғолиб чиқиши мумкин.

«Мураббий билан ишлашдан бутунлай завқ оляпман. У менга жамоада бошқаларга ўрнак бўлишим кераклигини айтди. Ўтган мавсум бошида у шундай деганди: «Сен анча кўп гол уришинг, тез-тез голли узатмалар беришинг ва барча жамоадошларингга намуна бўлишинг керак. Тўпсиз қандай меҳнат қилаётганингни кўриб, улар ҳам янада қаттиқроқ ҳаракат қилишади». У менга кўплаб кўрсатмалар берди, майдонда тўғри жойлашишимга ёрдам берди ва эркин ҳаракат қилишимга имкон яратди», — дея «RMC Sport» Дембеленинг сўзларидан иқтибос келтирмоқда.

«ПСЖ» ва «Арсенал» ўртасидаги Чемпионлар лигасининг ҳал қилувчи финал учрашуви 30 май куни бўлиб ўтади.