«Манчестер Юнайтед» бош мураббийи Майкл Кэррик Каземиро ҳақидаги саволга жавоб берди. Тажрибали ярим ҳимоячи мавсум якунланганидан кейин эркин агент мақомида клубни тарк этади.
Бразилиялик футболчи ўтган турдаги «Ноттингем Форест»га қарши учрашувда «Олд Траффорд» мухлислари билан хайрлашиб улгурган эди. Премьер-лиганинг сўнгги туридан ўрин олган «Брайтон»га қарши баҳсда эса у жамоасига ёрдам бера олмайди.
«Биз Каземиро учун «Ноттингем Форест»га қарши баҳс охиргиси бўлишини олдиндан ҳал қилиб қўйган эдик. Менимча, хайрлашув жуда чиройли чиқди — биз айнан шуни кутгандик», — дея «United Zone» Кэррикнинг сўзларидан иқтибос келтирмоқда.
Эслатиб ўтамиз, «Брайтон» – «МЮ» учрашуви якшанба, 24 май куни бўлиб ўтади. Манчестерликлар чемпионат якунига кўра учинчи ўринни эгаллашлари аллақачон кафолатланган.
