Миланнинг "Интер" клуби қанот ҳимоячиси Федерико Димарко Италия чемпионатининг жорий мавсумидаги энг яхши футболчи деб топилди. Бу ҳақда А Серия расмий сайти хабар бермоқда.
Италиялик футболчи 34 та учрашувда майдонга тушиб, ўз ҳисобига 6 та гол ва 18 та голли узатмани ёздириб қўйди. Димарко 7 очколик фарқ билан лиганинг энг яхши ассистенти ҳисобланади.
28 ёшли ҳимоячи ушбу мукофотни "Интер" ва "Болонья" жамоалари ўртасидаги А Серия сўнгги тур учрашуви олдидан қабул қилиб олади. Баҳс эртага, 23 май куни бўлиб ўтади ва Тошкент вақти билан соат 21:00 да бошланади.
Димарконинг "нерадзуррилар" билан амалдаги меҳнат шартномаси 2027 йилнинг июнигача мўлжалланган.
