«Панатинаикос» клуби ўз расмий сайти орқали бош мураббий Рафаэль Бенитес билан ҳамкорлик тугатилганини эълон қилди. 66 ёшли испаниялик мутахассис грециялик жамоани ўтган йилнинг октябрь ойи охиридан бери бошқариб келаётган эди.

«Испаниялик мураббий ва унинг штабига клубдаги фаолияти давомида кўрсатган профессионализми ва ўз принциплари учун миннатдорчилик билдирамиз. Рафаэль Бенитесга келгуси касбий фаолиятида улкан муваффақиятлар тилаймиз», — дейилади клуб матбуот хизмати хабарида.

Бенитес бошқарувида жамоа барча мусобақаларда жами 41 та ўйин ўтказди: 20 та ғалаба, 11 та дуранг ва 10 та мағлубият.

Греция чемпионатининг асосий босқичида «Панатинаикос» 49 очко жамғариб, 4-ўринни эгаллаганди. Иккинчи босқич якунларига кўра ҳам жамоа турнир жадвалида тўртинчи поғонада қолди.