Англия терма жамоаси бош мураббийи Томас Тухель «Манчестер Сити» ҳимоячиси Жон Стоунзнинг жамоада катта роль ўйнашга тайёрлиги ҳақидаги саволга жавоб берди.

«Ҳа, акс ҳолда уни таркибга чақирмасдим. У чақирувдан руҳланган, мен эса уни сафда кўрганимдан хурсандман. Мен Жонга ишонаман.

Менимча, у жаҳон даражасидаги футболчи, ажойиб инсон ва ғалаба қозониш тажрибасига эга. У ғолиблик маданиятига қандай мослашишни билади. У майдондаги вазиятга қараб тактик жиҳатдан ўзгара олади. У ҳамон энг юқори даражадаги футболчи, буни унинг ўйинидан ва ҳаракатларидан кўриш мумкин.

Биз унинг машғулотлари бўйича кўплаб маълумотларни таҳлил қилдик. Саволингизни тушуниб турибман: мавсумнинг иккинчи қисмида унинг савиясини тасдиқловчи етарлича далиллар йўқ [ўйин амалиёти камлиги туфайли].

Хушхабар шундаки, у айни пайтда соғлом. Ёмон хабар эса — у биз истаганимизчалик кўп ўйнамади. Аммо ўйлашимча, биз Жаҳон чемпионатига кечроқ старт олишимизнинг афзалликларидан фойдалана оламиз. Биринчи ўйингача ҳали тўрт ҳафта вақтимиз бор. Биз ўз принципларимизга қайтамиз. Иккита ўртоқлик ўйинида унга амалиёт бериш имкониятимиз бор ва шунда, умид қиламанки ва ишонаманки, у биз учун кучли турнир ўтказади», – деди Тухель.

Стоунз ўн йил давом этган «Манчестер Сити»даги фаолиятини мавсум якунида якунлайди. Жорий АПЛ мавсумида ҳимоячи «шаҳарликлар» сафида 8 та ўйинда майдонга тушди.