«Манчестер Юнайтед» бош мураббийи Майкл Кэррик мавсум якунига келиб ишдан чарчамаганини тан олди. Бугун Премьер-лигада сўнгги тур ўйинлари бўлиб ўтади. Кучли учликдан жой олишни ва Чемпионлар лигаси йўлланмасини аллақачон нақд қилган «қизил иблислар» сафарда «Брайтон»га қарши баҳс олиб боришади.
«Очиғини айтсам, мен дам олишга муҳтож эмасман. Ўзимни яхши ҳис қиляпман. Иш ритмига киришиб кетасан, кўникасан, шу оқимга қўшиласан. Мен бу ердаги ҳар бир дақиқадан завқ оляпман ва албатта, танаффус керак деган ҳиссиёт йўқ», — деди Кэррик матбуот анжуманида.
Яқинда инглиз мутахассиси клуб билан шартномасини 2028 йилнинг ўрталарига қадар узайтирган эди.
