«Арсенал» мухлислари «Кристал Пэлас»га қарши ўйинда «Манчестер Сити» мухлисларини мазах қилишди.

АПЛнинг 38-тур доирасидаги баҳс «Селхерст Парк» стадионида бўлиб ўтмоқда. Эслатиб ўтамиз, «Арсенал» муддатдан олдин чемпионликни расмийлаштириб бўлган.

«Канонирлар»нинг баъзи мухлислари стадионга ёрлиғида «Манчестер Сити» логотипи ва «115 мл» ёзуви бўлган пластик идишларда сув олиб киришди. Бу «шаҳарликлар»нинг молиявий қоидабузарликлар билан боғлиқ 115 та айбловга ишора ҳисобланади.

Аввалроқ ижтимоий тармоқларда «Манчестер Сити» мухлисининг «Арсенал» логотипи туширилган худди шундай идиш билан тушган суратлари тарқалган эди. 19 апрель куни 33-тур доирасидаги ўзаро ўйин олдидан «Этихад» стадиони атрофида шундай идишларда сув сотилганди. Ўшанда «шаҳарликлар» мухлислари «Арсенал»нинг аввалги икки мавсумда бой берган чемпионлик имкониятлари ва жамоалар ўртасидаги очколар фарқи қисқарганини мазах қилишган эди.