Италиянинг «Комо» клуби бош мураббийи Сеск Фабрегас жамоасининг Чемпионлар Лигасига йўлланма олгани ҳақида фикр билдирди. Италия чемпионатининг сўнгги турида «Кремонезе» устидан қозонилган ғалаба жамоага якуний тўртинчи ўринни тақдим этди.

«Парма» билан ўйиндан олдин йигитларга Чемпионлар Лигасига чиқиш учун иккита ғалаба кифоя қилишини айтгандим. Мен жамоага олтинчи ўриндан бошлаб, ҳаммани қувиб ўтган ва ғалаба қозонган велопойгачи ҳақидаги видеони кўрсатдим. Вазифамиз ундан ўрнак олиш эди ва биз буни уддаладик.

Бу жуда ёш жамоа билан қўлга киритилган улкан ютуқ. Таркибимизда 23 ёшгача бўлган футболчилар жуда кўп. Президент менга тўлиқ ваколат берди, шу сабабли кўплаб қарорларни қабул қилишимга ва танловлар қилишимга тўғри келди.

Бундан 4 йил аввал бу ерга футболчи сифатида келганимда, биз барда кийинардик. Энди бўлса — Чемпионлар Лигасидамиз. Икки нафар физиотерапевт билан суҳбатлашиб, спорт марказимиз бўлмаган пайтларни, ҳатто номи эсимда йўқ жойларда машғулот ўтказганимизни эсладик. У пайтлари массаж ҳам барда ёки майдоннинг ўзида қилинарди. Соат 12:00 ёки 12:30 бўлиши билан ҳамма уйига кетар, ҳеч ким қолмасди. Ҳозир эса Серия Ада тўртинчимиз. Эришган натижаларимиздан жуда бахтиёрман»,— дейди мураббий La Gazetta dello Sport нашрига берган интервьюсида.

«Комо» клуби 2003 йилда A Серияни тарк этгач, орадан 21 йил ўтиб юқори дивизионга қайтган эди. Ўтган мавсумни жамоа 10-ўринда якунлаган.