«Наполи» бош мураббийи Антонио Конте мавсумнинг якуний матбуот анжуманида клуб президенти Аурелио Де Лаурентиснинг фикрларига қўшилмаслигини билдирди. Аввалроқ, A Серияда 2-ўринни эгаллаган Конте неаполликлар лагерини тарк этиши маълум бўлганди. Скудеттони эса «Интер» қўлга киритди.

Де Лаурентис: «Агар жароҳатлар бўлмаганида, сиз чемпионатда осонлик билан ғолиб чиққан бўлардингиз».

Конте: «Асло ундай эмас».

Де Лаурентис: «Нима учун? Мен сизга айтяпман-ку».

Конте: «Мен бунга мутлақо қўшилмайман. «Интер»га тан бериш керак, бу ажойиб жамоа. Ўтган йили улар Чемпионлар Лигаси финалигача боришди, бу йил эса янада кучайишди. Улар ғалабага лойиқ эдилар».

Де Лаурентис: «Хўш, «Интер» шу даражада кучли экан, нима учун Европада ўтган йилгидек натижа кўрсата олмади?»

Конте: «Улар биздан кўра кўпроқ иш қилишди. Улар олдинга қадам ташлашди».

Де Лаурентис: «Яхши, лекин бу энди бошқа тарих».

Конте: «Узр, лекин мен бунақа нарсаларга ёпишиб олишни ёқтирмайман. Биз бошқаларнинг ғалабасини тан олишимиз ва ҳурмат кўрсатишимиз керак. Агар ўзимизга нисбатан ҳурмат истасак, аввало ўзимиз ҳурмат қилишни ўрганишимиз лозим. Жароҳатлар бўладими-йўқми, «Интер» ғалабага ҳақли эди. Балки жароҳатлар бўлмаганида, биз Чемпионлар Лигасидан чиқиб кетган бўлармидик».