Ҳужумчи Муҳаммад Салоҳ «Ливерпуль»дан кетганидан кейинги ҳиссиётлари билан ўртоқлашди. Англия Премьер-лигаси 38-туридан ўрин олган «Брентфорд»га қарши ўйин (1:1) мисрлик футболчи учун клубдаги тўққиз йиллик фаолиятидан кейинги сўнгги учрашув бўлди. Салоҳ билан бирга ҳимоячи Эндрю Робертсон ҳам жамоани тарк этди.
«Мен кўп йиғладим, менимча, бутун умрим давомидагидан ҳам кўпроқ! Бундай масканни тарк этиш жуда оғир. Машғулот базасида ҳам бироз йиғлаб олдим. Мен унчалик ҳиссиётли инсон эмасман, сизлар ОАВда буни камдан-кам кўрасиз. Сиз мени ҳамиша қаттиққўл ва тажовузкор ҳолатда кўришга ўргангансиз, лекин ичимда гўёки ёш боламан. Бу жуда қийин. Биз ёшлигимизни шу ерда ўтказдик, бошидан охиригача боримизни баҳам кўрдик. Биз ҳатто қўлга киритганларимизни орзу ҳам қилмагандик, лекин буни мана шу клуб учун қилдик. Биз уни лойиқ бўлган жойига қайтардик.
Кийиниш хонасидаги ўйинчиларга айтар сўзим шу: қаранг, ҳозир клуб ҳамма нарса учун курашмоқда. Мухлислар бундан камига рози бўлишмайди. Сиз майдонда борингизни бериб ўйнар экансиз, натижа қандай бўлиши улар учун аҳамиятсиз. Улар сизни абадий севиб қолишади. Сизларга айтмоқчи бўлган гапим — гап фақат талантда эмас, балки қолган ҳамма нарсада. Мана нима учун уни [Робертсонни] ҳаммадан кўпроқ яхши кўришади: у майдонда борини берарди ва мухлислар шунинг учун уни севишади. «Ливерпуль»дан кетиш осон эмас, лекин ҳаёт шунақа, биз олдинга интилишимиз керак», — дейди Салоҳ клуб расмий сайтига.
