Инсайдер Фабрицио Романо «Интер Майами» ҳужумчиси Лионель Мессининг саломатлиги ҳақида маълумот берди. Аргентиналик футболчи «Филадельфия Юнион»га қарши учрашувда (6:4) ноқулайлик ҳис қилгани сабабли 73-дақиқада алмаштирилган эди.
«Лионель Месси ноқулайлик ҳис қилмоқда, аммо текширувлар Жаҳон чемпионати олдидан жиддий жароҳат йўқлигини тасдиқлади. Месси Аргентина терма жамоаси учун ўйнай олади», — деб ёзди Романо ўзининг X ижтимоий тармоғидаги саҳифасида.
Аввалроқ Лионель Месси Аргентина миллий терма жамоасининг ЖЧ-2026 учун кенгайтирилган таркибига киритилгани ҳақида хабарлар тарқалган эди.
2026 йилги футбол бўйича Жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Аргентина терма жамоаси Жазоир, Австрия ва Иордания билан бир гуруҳдан ўрин олган.
Аргентина амалдаги жаҳон чемпиони ҳисобланади.













