Лондоннинг «Тоттенхэм» клуби «Борнмут»нинг 29 ёшли ҳимоячиси Маркос Сенеси билан келишувга эришди. Бу ҳақда журналист ва инсайдер Николо Скира ўзининг Х ижтимоий тармоғидаги саҳифасида хабар бермоқда.

Манба берган маълумотларга кўра, Сенеси «Тоттенхэм» сафига эркин агент сифатида қўшилади ва 2030 йилгача мўлжалланган шартномага қўл қўяди. Унинг маоши йилига 5 миллион еврони ташкил қилади.

Сенеси фаолиятини «Фейеноорд»да бошлаган бўлиб, 2022 йилда 15 миллион евро эвазига «Борнмут»га ўтган эди. Аргентиналик ҳимоячи ушбу клуб сафида жами 128 та ўйин ўтказиб, 6 та гол урди ва 10 та голли узатмани амалга оширди.

Ҳозирги вақтда Transfermarkt портали Сенесининг бозор қийматини 22 миллион еврога баҳоламоқда.