«Ювентус» клуби ёзда эркин агентга айланадиган «Ливерпуль» ҳимоячиси Эндрю Робертсон учун курашга қўшилди.

Журналист Жанлука Ди Марцио берган маълумотларга кўра, «бьянконери» раҳбарияти 31 ёшли шотландиялик футболчига аллақачон таклиф билан чиққан. Шунга қарамай, футболчи учун асосий даъвогар сифатида ҳали ҳам «Тоттенхэм» қолмоқда.

Робертсон 2017 йилдан бери «Ливерпуль» шарафини ҳимоя қилиб келаётган эди ва мавсумнинг сўнгги туридаги «Брентфорд»га қарши ўйиндан кейин «Энфилд» билан хайрлашди. «Шпорлар» футболчи билан деярли келишувга эришиб бўлишган, бироқ «Ювентус» вазиятни ўз фойдасига ўзгартиришга умид қилмоқда.

Туринликларнинг қизиқишига жамоа мудофаасини кучайтириш зарурияти ва Чемпионлар лигаси йўлланмасидан қуруқ қолганидан кейинги чекланган бюджет сабаб бўлган. Эркин агентнинг трансфери италияликлар учун жуда жозибали вариант бўлиб кўринмоқда.

Робертсоннинг келажаги Жаҳон чемпионати бошлангунга қадар ҳал бўлиши кутилмоқда.