«Ювентус» клуби раҳбарият ва мураббийлар штаби ўртасидаги ваколатлар тақсимоти фонида ички кескинликни бошдан кечирмоқда. Бу ҳақда Tuttosport нашри хабар бермоқда.
Манбанинг маълумотига кўра, клуб эгаси Джон Элканн спорт директори Дамьен Комоллини қўллаб-қувватлашга тайёр, бироқ шу билан бирга ҳокимият мувозанатини бош мураббий Лучано Спаллетти фойдасига ўзгартирмоқчи. Элканннинг асосий ғояси — Спаллеттига ҳам ўйин услуби, ҳам трансфер қарорларига кўпроқ таъсир ўтказиш имкониятини беришдан иборат.
Клубда бир йил олдин бошланган лойиҳа мослаштиришга муҳтожлиги тан олинмоқда, айниқса «Ювентус» А Серияда кучли тўртликка кира олмаганидан кейин бу масала долзарб бўлиб қолди.
Яқин кунларда Элканн Комолли билан яккама-якка учрашув ўтказиши кутилмоқда. Ўзаро келишувга эришилгач, клубнинг келажакдаги тузилмаси муҳокамасига бош мураббий ҳам жалб этилади. Маълум бўлишича, Спаллетти ўз ёнида таркибни шакллантириш устида ҳар куни ишлайдиган алоҳида трансфер мутахассисини кўришни истамоқда. Ҳозирда жамоада бундай шахс мавжуд эмас.
