Мадриднинг «Реал» клуби ҳужумчиси Винисиус Жуниор терма жамоадоши Неймарнинг Бразилия сафига қайтиши ҳақида ўз фикрлари билан ўртоқлашди.

Маълумки, бош мураббий Карло Анчелотти 34 ёшли «Сантос» футболчисини Жаҳон чемпионати учун якуний таркибга киритгани кўпчилик учун кутилмаган янгилик бўлди. Таъкидлаш жоизки, юлдузли ҳужумчи «пентакампеонлар» шарафини 2023 йилдан буён ҳимоя қилмаган эди.

«Йиғинлардан олдин Неймар доим: "Лаънат бўлсин, Анчелотти мени яна чақирмади, жуда хафаман", деб айтарди. Мен эса унга мураббий унга ишонишини ва энг муҳим паллада албатта таклиф қилишини айтардим», – дея Винисиуснинг сўзларини келтиради Madrid Zone.

Эслатиб ўтамиз, Бразилия терма жамоаси Жаҳон чемпионати гуруҳ босқичида Марокаш, Гаити ва Шотландия терма жамоаларига қарши майдонга тушади.