«Бавария» ярим ҳимоячиси Йозуа Киммих ўз жамоадоши Мануэль Нойернинг Германия терма жамоасига қайтиши ҳақида илиқ фикрларни билдирди. 40 ёшли тажрибали дарвозабон бош мураббий Юлиан Нагельсманн томонидан Жаҳон чемпионати учун қайдномага киритилди.
«Бундан жуда хурсандман. Биз 11 йилдан бери бирга ўйнаймиз. Унинг биз билан Жаҳон чемпионатига бориши ажойиб янгилик», — деди Киммих.
Таъкидлаш жоизки, Нойернинг қайтишига қарамай, Германия терма жамоаси сардори сифатида 31 ёшли Киммих қолади. Мавзуга ҳазиломуз тарзда ёндашган Йозуа Bild нашрига берган интервьюсида шундай деди: «Ҳа, ростдан ҳам, бу ҳақда ҳатто ўйлаб ҳам кўрмагандим. Биринчи қулай фурсатда Мануэлга энди унинг сардори мен эканимни айтиб қўяман».
Эслатиб ўтамиз, Германия терма жамоаси Жаҳон чемпионати гуруҳ босқичида Кюрасао, Кот-д’Ивуар ва Эквадор терма жамоалари билан рақобатлашади.
