«Комо» бош мураббийи Сеск Фабрегас Англия Премьер-лигасига ўтишдан бош тортди. Инсайдер Фабрицио Романонинг Time2play учун ёзган мақоласида хабар беришича, испаниялик мутахассис АПЛдан тушган таклифларни рад этган ва Италияда ишлашда давом этишини тасдиқлаган. У жамоада қолади ва «Комо»ни УЕФА Чемпионлар лигасида бошлайди.
«Комо» ўз тарихида илк бор Европанинг энг нуфузли клуби турнирига йўлланма олди. Жамоа 2025/26 йилги мавсум якунларига кўра А Серия турнир жадвалида «Милан» ва «Ювентус»ни ортда қолдириб, тўртинчи ўринни эгаллади.
Эслатиб ўтамиз, 2023/2024 йилги мавсумда «Комо» Серия Б да иштирок этган эди. Бир йил ўтиб, элитада дебют қилган жамоа чемпионатни 10-ўринда якунлаган эди. Сўнгги икки йил ичида Фабрегас қўл остида клуб катта сакрашга эришди.
