Лондоннинг «Арсенал» клуби Англия Премьер-лигаси (АПЛ) ва Чемпионлар лигасида ҳукмронлик даврини бошлаши керак. Ҳозирда жамоа энг нуфузли еврокубок мусобақасида ғалаба қозонишга ҳар қачонгидан ҳам яқин ва бунга муносибдир.
Бундай фикр билан «канонирлар»нинг собиқ устози Арсен Венгер журналистлар билан суҳбатда ўртоқлашди. Айнан унинг қўл остида лондонликлар Чемпионлар лигаси финалига чиққан, аммо «Барселона»га мағлуб бўлишган эди.
УЕФА матбуот хизмати франциялик мутахассиснинг сўзларини келтиради:
«Ўшанда муваффақиятдан 13 дақиқа узоқликда эдик. Менимча, жамоаларнинг имкониятлари 50/50, аммо мен «Арсенал»га ставка қилган бўлардим».
Унинг қўшимча қилишича, «Арсенал» нафақат АПЛда, балки Европа майдонларида ҳам ҳукмронликни бошлаши керак.
Эслатиб ўтамиз, 2025/2026 йилги мавсумда «канонирлар» 22 йил ичида илк бор чемпионлик унвонини қўлга киритди. 30 май куни «Арсенал» Чемпионлар лигаси финалида амалдаги чемпион — «ПСЖ» билан тўқнаш келади.
