Londonning «Arsenal» klubi Angliya Premyer-ligasi (APL) va Chempionlar ligasida hukmronlik davrini boshlashi kerak. Hozirda jamoa eng nufuzli yevrokubok musobaqasida g‘alaba qozonishga har qachongidan ham yaqin va bunga munosibdir.

Bunday fikr bilan «kanonirlar»ning sobiq ustozi Arsen Venger jurnalistlar bilan suhbatda o‘rtoqlashdi. Aynan uning qo‘l ostida londonliklar Chempionlar ligasi finaliga chiqqan, ammo «Barselona»ga mag‘lub bo‘lishgan edi.

UYEFA matbuot xizmati fransiyalik mutaxassisning so‘zlarini keltiradi:

«O‘shanda muvaffaqiyatdan 13 daqiqa uzoqlikda edik. Menimcha, jamoalarning imkoniyatlari 50/50, ammo men «Arsenal»ga stavka qilgan bo‘lardim».

Uning qo‘shimcha qilishicha, «Arsenal» nafaqat APLda, balki Yevropa maydonlarida ham hukmronlikni boshlashi kerak.

Eslatib o‘tamiz, 2025/2026 yilgi mavsumda «kanonirlar» 22 yil ichida ilk bor chempionlik unvonini qo‘lga kiritdi. 30 may kuni «Arsenal» Chempionlar ligasi finalida amaldagi chempion — «PSJ» bilan to‘qnash keladi.