Италиялик собиқ ҳужумчи Антонио Кассано Массимилиано Аллегрининг истеъфоси ҳақида ўз фикрини билдирмай иложи йўқ эди. «Милан»нинг америкалик хўжайинлари жамоа чемпионатнинг сўнгги турида мағлуб бўлиб, Чемпионлар лигаси йўлланмасидан мосуво бўлгач, мураббийга жавоб бериб юборишди.
«Аллегри ўз қилган ишидан уялиши керак. Мен бўлганимда уялган бўлардим», — дея Кассанонинг сўзларидан иқтибос келтиради pianetamilan.it.
Эслатиб ўтамиз, «Милан» Италия чемпионати — А Серия турнир жадвалида бешинчи ўринни эгаллаб, куз мавсумида Европа лигасида иштирок этади. Клуб охирги марта тўрт йил аввал, 2022 йилда Италия чемпиони бўлган эди. Ўшанда бу натижага 2024 йилда клубни тарк этган Стефано Пиоли бошчилигида эришилганди.
