«Интер» президенти Жузеппе Маротта Ромелу Лукакунинг «Наполи»даги вазияти ҳақида ўз фикрларини билдирди. Баҳорда ҳужумчи ўз клуби билан можарога киришган эди: у терма жамоалар ўйинидаги танаффусдан сўнг Бельгиядан қайтишдан бош тортиб, жаҳон чемпионати олдидан тезроқ формага кириш учун индивидуал дастур асосида тикланишни лозим топди. «Наполи» футболчига бундай рухсат бермаган эди, шу сабабли унга нисбатан машғулотлардан вақтинча четлатиш ва жарима каби интизомий чоралар қўлланилди. Кейинчалик ҳужумчи жамоага қайтди ва узр сўради.

«Лукакунинг бундай аҳволга тушиб қолгани ачинарли, аммо биз унинг қандай инсон эканини яхши биламиз. Бу унинг характери, табиати шунақа. У бизга [«Интер»га] қайтишини ваъда қилган эди, лекин буни бажармади», — деди Маротта DAZN билан суҳбатда.

Доимий жароҳатлар сабабли Ромелу Лукаку ўтган мавсумда атиги еттита ўйинда майдонга тушди.