Мадриднинг "Реал" клуби ҳужумчиси Килиан Мбаппе мухлислар ўртасида ўтказилган сўровнома натижаларига кўра, жамоанинг 2025/26 йилги мавсумдаги энг яхши футболчиси деб топилди ва "Mahou Five Star Player" совринига лойиқ кўрилди.
Франциялик юлдуз ушбу нуфузли индивидуал мукофотни кетма-кет иккинчи мавсумдирки ҳеч кимга бермай келмоқда.
Ортда қолган мавсум 27 ёшли форвард учун голларга бой бўлди. Мбаппе Испания Ла Лигасида рақиблар дарвозасини 25 бор ишғол этиб, турнирнинг энг яхши тўпурари сифатида «Пичичи» совринини қўлга киритди. Шунингдек, у УЕФА Чемпионлар Лигасида ҳам ўз ҳисобига 15 та гол ёздириб қўйган ҳолда, Европада энг яхши бомбардирга айланди.
Маълумот учун, Килиан Мбаппе 2025/26 йилги мавсум давомида "Реал Мадрид" либосида барча мусобақаларда жами 44 та учрашувда майдонга тушиб, рақиблар дарвозасига 42 та гол уришга муваффақ бўлди. Худди шунингдек, у мавсум давомида 4 марта «Ойнинг энг яхши футболчиси» номига ҳам сазовор бўлган эди.
