«Ливерпуль» дарвозабони Алиссон ёзги трансферлар вақтида «Ювентус»га ўтмаслиги мумкин. La Gazzetta dello Sport нашрига кўра, инглиз клуби айни дамда бразилиялик посбоннинг Турин жамоасига ўтишини тўсиб қўймоқда. Бунга сабаб, «қизиллар» Муҳаммад Салоҳ кетганидан кейин яна бир етакчи футболчисини йўқотишни истамаяпти.

Шу билан бирга, Алиссоннинг ўзи «Ювентус»га ўтишни хоҳламоқда ва аллақачон туринликлар билан 2029 йилнинг ёзигача мўлжалланган шахсий шартнома бўйича дастлабки келишувга эришган.

Алиссон «Ливерпуль» сафига 2018 йилда «Рома»дан 72 миллион евро эвазига келиб қўшилган эди. Унинг амалдаги шартномаси 2027 йилнинг 30 июнига қадар амал қилади. 2025/26 йилги мавсумда бразилиялик дарвозабон «қизиллар» сафида барча мусобақаларда 35 та ўйин ўтказиб, 37 та гол ўтказиб юборди ва 13 та учрашувда ўз дарвозаси дахлсизлигини сақлаб қолди.