«Liverpul» darvozaboni Alisson yozgi transferlar vaqtida «Yuventus»ga o‘tmasligi mumkin. La Gazzetta dello Sport nashriga ko‘ra, ingliz klubi ayni damda braziliyalik posbonning Turin jamoasiga o‘tishini to‘sib qo‘ymoqda. Bunga sabab, «qizillar» Muhammad Saloh ketganidan keyin yana bir yetakchi futbolchisini yo‘qotishni istamayapti.

Shu bilan birga, Alissonning o‘zi «Yuventus»ga o‘tishni xohlamoqda va allaqachon turinliklar bilan 2029 yilning yozigacha mo‘ljallangan shaxsiy shartnoma bo‘yicha dastlabki kelishuvga erishgan.

Alisson «Liverpul» safiga 2018 yilda «Roma»dan 72 million yevro evaziga kelib qo‘shilgan edi. Uning amaldagi shartnomasi 2027 yilning 30 iyuniga qadar amal qiladi. 2025/26 yilgi mavsumda braziliyalik darvozabon «qizillar» safida barcha musobaqalarda 35 ta o‘yin o‘tkazib, 37 ta gol o‘tkazib yubordi va 13 ta uchrashuvda o‘z darvozasi daxlsizligini saqlab qoldi.