«Арсенал» ҳимоячиси Риккардо Калафьори жамоанинг Премьер-лига чемпионлигини қандай нишонлагани ҳақида гапириб берди.
«Канонирлар» расман 19 май куни, яъни АПЛнинг 37-турида таъқибчиси «Манчестер Сити» «Борнмут» билан дуранг (1:1) ўйнаганидан сўнг чемпионликни расмийлаштириб олган эди.
«Премьер-лигада ғолиб чиқиш болаликдаги орзуларимдан бири эди. Мавсум қандай кечганини ҳисобга олсак, бу шунчаки ақл бовар қилмас воқеа бўлди.
Энг яхши лаҳза — «Борнмут» ва «Манчестер Сити» ўртасидаги ўйиннинг финал ҳуштаги чалинган вақт эди. Биз ҳаммамиз: ходимлар, ўйинчилар шодликдан портладик. Биз бирга эдик ва бир-биримизга энг яхши тилакларни тиладик.
Биз енгил тин олдик. Клубда 22 йил давомида чемпионлик бўлмаганди. Шаҳар бўйлаб юрар эканман, бу мухлислар ва одамлар учун қанчалик муҳим эканини англаб етдим», — деди Калафьори La Repubblica нашрига берган интервьюсида.
