«Ювентус» ҳужумчиси Душан Влахович жамоадан кетганидан кейин ҳам Италияда қолиши мумкин. Сербиялик футболчининг шартномаси бир ойдан сўнг якунига етади – томонлар ҳалигача уни узайтириш бўйича келишувга эриша олишмади.

Журналист Николо Скиранинг хабар беришича, 26 ёшли футболчини ўз сафига қўшиб олишга «Наполи» клуби қизиқиш билдирмоқда. Неаполликлар вакиллари «кекса синьора» форварди бўйича аллақачон расмий сўров юборишган.

Эслатиб ўтамиз, «Ювентус» А Серияда 6-ўринни эгаллаб, Чемпионлар лигасига чиқа олмади, «Наполи» эса мавсумни иккинчи ўринда якунлади. Душан Влахович ўтган мавсумда Турин жамоаси сафида барча мусобақаларда 23 та учрашув ўтказиб, 10 та гол ва 2 та голли узатмага муаллифлик қилди.