Португалия терма жамоаси бош мураббийи Роберто Мартинес Криштиану Роналдунинг 2030 йилги Жаҳон чемпионатида иштирок этиши мумкинлиги ҳақидаги фикрлари билан ўртоқлашди. Ҳозирда 41 ёшда бўлган Роналду яқинлашиб келаётган ёзги мундиалда ўз фаолиятидаги рекорд даражадаги олтинчи Жаҳон чемпионатида иштирок этади.
Ҳалигача фаолиятини якунлаганини эълон қилмаган Роналду 2030 йилги мундиалда ўйнай оладими, деган саволга Мартинес «Cadena Ser»га берган интервьюсида шундай жавоб қайтарди:
«Бунга ҳеч ким шубҳа қилмаслиги керак. У бунга муносиб. Биз Криштиану Роналдунинг ишга бўлган ёндашув моделини Португалиядаги барча ёш футболчиларга сингдиришни жуда истардик, чунки у ибрат олишга арзигулик намунадир», — деди Мартинес.
Португалия терма жамоаси Жаҳон чемпионатидаги иштирокини 17 июнь куни Конго ДР терма жамоасига қарши баҳс билан бошлайди. Сўнгра, 23 июнь куни Ўзбекистон, 27 июнь куни эса Колумбия терма жамоалари билан тўқнаш келади.
