Portugaliya terma jamoasi bosh murabbiyi Roberto Martines Krishtianu Ronalduning 2030 yilgi Jahon chempionatida ishtirok etishi mumkinligi haqidagi fikrlari bilan o‘rtoqlashdi. Hozirda 41 yoshda bo‘lgan Ronaldu yaqinlashib kelayotgan yozgi mundialda o‘z faoliyatidagi rekord darajadagi oltinchi Jahon chempionatida ishtirok etadi.

Haligacha faoliyatini yakunlaganini e’lon qilmagan Ronaldu 2030 yilgi mundialda o‘ynay oladimi, degan savolga Martines «Cadena Ser»ga bergan intervyusida shunday javob qaytardi:

«Bunga hech kim shubha qilmasligi kerak. U bunga munosib. Biz Krishtianu Ronalduning ishga bo‘lgan yondashuv modelini Portugaliyadagi barcha yosh futbolchilarga singdirishni juda istardik, chunki u ibrat olishga arzigulik namunadir», — dedi Martines.

Portugaliya terma jamoasi Jahon chempionatidagi ishtirokini 17 iyun kuni Kongo DR terma jamoasiga qarshi bahs bilan boshlaydi. So‘ngra, 23 iyun kuni O‘zbekiston, 27 iyun kuni esa Kolumbiya terma jamoalari bilan to‘qnash keladi.