Теннис бўйича 2020 йилги Олимпия ўйинлари чемпиони, дунёнинг учинчи ракеткаси, германиялик Александр Зверев Чемпионлар лигаси финалида қайси жамоага мухлислик қилишини маълум қилди. Бугун, 30 май куни Будапештдаги «Пушкаш Арена»да «Арсенал» ва «ПСЖ» футболчилари ўзаро тўқнаш келишади.

— Яқинда Чемпионлар лигаси финали бўлади, ўйинни томоша қиласизми ва кимга мухлислик қиласиз?

— Мен «Бавария»нинг ашаддий мухлисиман. Тўғриси, «Бавария» ғалаба қозонишига умид қилгандим. Лекин менга «ПСЖ»нинг ўйини жуда ёқади, уларнинг иштирокидаги баҳсларни томоша қилишни яхши кўраман. Шу сабабли ҳужумкор ва агрессив услубдаги ўйин бўлишини кутяпман, — дея Зверевнинг сўзларини келтиради TNT Sports.

Эслатиб ўтамиз, ярим финал босқичида «ПСЖ» икки ўйин натижасига кўра «Бавария»ни 6:5 ҳисобида мағлуб этган эди.