Лондоннинг «Арсенал» клуби собиқ футболчиси Робер Пирес Чемпионлар лигаси финали борасида ўз фикрини маълум қилди. Бугун оқшом Будапештда унинг собиқ жамоаси Франциянинг «ПСЖ» клубига қарши бош соврин учун майдонга тушади.
«Нима учун «ПСЖ» финалда муваффақиятсизликка учрайди? Ҳаммаси оддий, мен парижлик футболчиларда ғалабага бўлган иштиёқ камроқ эканини кўряпман. Улар Франция чемпиони бўлишди ва Будапештга ҳаддан ташқари ўзларига ишониб келишади. «Арсенал» футболчилари эса қарши ҳужумда ва прессингда жуда яхши ўйнашади. Мана нима учун парижликлар ғалаба қозона олмайди», — деди Пирес Canal+ телеканалига берган интервьюсида.
Эслатиб ўтамиз, 2006 йилги Чемпионлар лигаси финалида «Арсенал» дарвозабон Йенс Леманннинг четлатилишидан сўнг, ўйиннинг асосий қисмини бир киши кам бўлиб ўтказган ва «Барселона»га 1:2 ҳисобида имкониятни бой берган эди.
