«Интер» вице-президенти Хавьер Дзанетти Фабрицио Романога берган интервьюсида Лаутаро Мартинеснинг жамоага келиши тафсилотлари ва футболчининг ўсиши ҳақида сўзлаб берди.

Дзанеттининг таъкидлашича, «Интер» Лаутарога Аргентинадаёқ эътибор қаратган ва имкониятдан фойдаланиб, уни зудлик билан қўлга киритишга ҳаракат қилган.

«Пьеро Аузилио билан биргаликда трансфер устида ишлашни бошладик, кейин Пьеро Аргентинага учиб кетди», — дея эслади Дзанетти.

Вице-президент ёш футболчиларни сотиб олишда уларнинг келажакдаги салоҳияти муҳимлигини таъкидлади:

• «Жанубий Америкадан ёш ўйинчини олганингизда, у ҳозир ким экани ҳақида эмас, 4-5 йилдан кейин нималарга қодирлиги ҳақида ўйлайсиз».

• «Тўғрисини айтсам, биз унинг ҳозирги даражасига етишини тахмин қилгандик, лекин у кутганимиздан ҳам ортиқроқ натижа кўрсатди».

Дзанетти Лаутаронинг клубга садоқатини алоҳида қайд этди: «Бировнинг омма олдида "мен клубда абадий қоламан" деб айтишини ҳар доим ҳам учратавермайсиз. У аргентиналик сифатида менга яқин бўлиши билан бирга, улкан қадриятга эга ва ҳеч ким унинг маҳоратини шубҳа остига олмайди».

Маълумот учун: Лаутаро Мартинес 2025/26 йилги мавсумда «Интер» сафида барча турнирларда 41 та ўйинда майдонга тушиб, 22 та гол ва 6 та голли узатмага муаллифлик қилди.