«Манчестер Сити» ярим ҳимоячиси Бернарду Силванинг «Барселона»га ўтиши мумкинлиги ҳақидаги гап-сўзлар яна кун тартибига чиқди.

Журналист Фернандо Полонинг маълум қилишича, каталонияликлар португалиялик футболчини ўз таркибида кўришни истамоқда. Бироқ трансфер амалга ошиши учун клуб олдида иккита асосий тўсиқ мавжуд. Биринчидан, «Барселона» раҳбарияти айни дамда бошқа трансферларга устуворлик қаратган. Иккинчидан, бош мураббий Ханс-Дитер Флик айни дамда жамоанинг марказий чизиғида футболчилар сони кўплигини таъкидлаб, трансферга ҳозирча ўз розилигини бермаган.

Мураббийлар штаби янги футболчини таклиф қилиш учун биринчи навбатда ярим ҳимоя чизиғидан кимдир кетиши керак, деган қарорга келган. Тахминларга кўра, клубни тарк этиши кутилаётган асосий номзод Марк Касадо бўлиб турибди. Агар ушбу трансфер амалга ошса, Бернарду Силванинг «Камп Ноу»га ўтиши учун йўл очилиши мумкин.

Эслатиб ўтамиз, Бернарду Силва 2017 йилдан буён «Манчестер Сити» сафида тўп суриб келмоқда. 2025/26 йилги мавсумда у «шаҳарликлар» таркибида барча мусобақаларда 53 та учрашувда майдонга тушиб, 3 та гол урди ва 5 та голли узатмага муаллифлик қилди.