«Бавария» ва Франция терма жамоаси собиқ ҳимоячиси Биксант Лизаразю Чемпионлар лигаси финалида «Арсенал»нинг ўйини ҳақида ўз фикрларини билдирди. Кеча «канонирлар» бош еврокубокнинг ҳал қилувчи баҳсида «ПСЖ»га имкониятни бой беришди (асосий вақтда 1:1, пенальтилар сериясида 3:4).

— «Арсенал» онгли равишда футбол ўйнамасликка қарор қилдими?

— Кўриниб турибдики, уларнинг режаси «ПСЖ» ҳужум чизиғига ўз имкониятларини кўрсатишга йўл қўймаслик ва вақтни чўзиш орқали уларни асабийлаштиришдан иборат эди. Ўйин анча тартибсиз кечди, парижлик футболчиларнинг ғазабланаётганини кўрдик. «ПСЖ» ўз тезлигида ўйнай олмади. Улар ҳужумга чуқурлик бера олишмади, чунки «Арсенал» ҳимояда ажойиб ўйнади ва жамоавий зичликни доим сақлаб турди.

— Кечаги ўйинда сизни энг кўп нима ҳайрон қолдирди?

— «Арсенал»нинг бир сония бўлса ҳам ўз режасидан чекинмагани. Айниқса, қўшимча вақтларда «ПСЖ» ўз етакчилари — Хвича, Дембеле ва Витиньяларни майдондан олганда. «Канонирлар» янги футболчиларни тушириб, фаолроқ ўйнай бошлашди, лекин ниятини охиригача етказа олишмади. Менимча, бу хато эди: улар кўпроқ нарса қилишлари мумкин эди.

— «Арсенал»га амбиция етишмаяптими?

— Ўйлайманки, ҳа. «Арсенал»да ўйин назоратини қўлга олиш учун имкониятлар бор эди, лекин улар «ПСЖ»га ўйнашга йўл қўймаслик ғоясига ҳаддан ташқари берилиб кетишди. «ПСЖ» ўз етакчиларини алмаштирган пайтда майдонга тушган футболчиларнинг маҳоратини ҳисобга олсак, «Арсенал»га вазиятдан фойдаланиш учун бироз журъат етишмади, — деди Лизаразю.