Конференциялар лигасининг сўнгги мавсумидаги энг яхши жамоасига айланган «Кристал Пэлас» бош мураббийлик лавозимига франциялик мутахассис Пьер Саж номзодини ўрганмоқда. Бу ҳақда talkSPORT хабар бермоқда.

Аввалги устоз Оливер Гласнер клуб билан шартномани узайтирмади. «Бургутлар» Андони Ираола билан келишишга уринган эди, аммо у «Борнмут»дан «Ливерпуль»га ўтиши кутилмоқда.

47 ёшли Пьер Саж ҳозирда «Ланс»да ишламоқда. Якунланган мавсумда у жамоасини Франция Кубоги ғолиблигига олиб чиқди, шунингдек, чемпионатда иккинчи ўринни эгаллаб, Чемпионлар лигаси йўлланмасини қўлга киритишини таъминлади.

Сажнинг муваффақиятлари бир нечта клублар эътиборини тортди, бироқ мураббийнинг ўзи иш жойини ўзгартиришни режалаштирмаётганини айтган. Агар Саж билан музокаралар самарасиз бўлса, клуб бошқа номзодларга мурожаат қилиши мумкин. Муҳокама қилинаётган вариантлар қаторида ҳозирда «Ковентри Сити»да ишлаётган Фрэнк Лэмпард, шунингдек, Киран Маккенна, Шон Дайч ва Томас Франк номлари тилга олинмоқда.