"Реал" президенти лавозимига номзод Энрике Рикельме, агар сайловда ғолиб чиқса, "Манчестер Сити" ярим ҳимоячиси Родрини жамоага олиб келишга ваъда берди.
"Агар мен "Реал" президенти бўлсам, Родри каби ўйинчи "Мадрид"да ўйнайди", — деди Рикельме "Tiempo de Juego" дастурига берган интервьюсида.
Унинг сўзларига кўра, Родрининг трансфери Испания терма жамоасида бирорта ҳам "Реал" футболчиси йўқлигидек "оғриқли шармандалик"дан қочишга ёрдам беради.
Рикельме Родри ҳақидаги баёноти у илгари эълон қилган юлдузлар билан боғлиқ эмаслигини аниқлаштирди. Президентликка номзод уларнинг исмларини келаси чоршанба куни ошкор қилмоқчи. У гап Испаниядан ташқаридаги футболчилар ҳақида кетаётганини тасдиқлади.
"Аниқ исмлар айтилади. Агар мен президент бўлсам, булар "Реал"да ўйнаши керак бўлган ўйинчилардир", — деди Рикельме ва камида иккита трансфер амалга оширишни ваъда қилди.
