«Ювентус»нинг собиқ ҳужумчиси ва афсонаси Фабрицио Раванелли клуб ҳимоячиси Ллойд Келлини кескин танқид қилди. У инглиз футболчисининг ўйин сифатларини шубҳа остига олди.

«У баланд бўйли ва бақувват, лекин деярли ҳеч қачон бош билан ўйнамайди. Бўйи қарийб 2 метр бўлиб, ҳаводаги курашларда деярли ғалаба қозонмайдиган марказий ҳимоячини умуман кўрмаганман. Унинг ўйинга таъсири сезилмаяпти. Тўп унга келиб тушганда, қарор қабул қилишга жуда кўп вақт сарфлайди. Бундай футболчи «Ювентус»да ўйнай олмайди», — деди Раванелли Sportium платформасидаги жонли эфир пайтида.

Келли 2025 йилнинг февраль ойидан буён «Ювентус» шарафини ҳимоя қилиб келмоқда. У Турин клубига «Ньюкасл»дан ижара асосида ўтган эди, кейинчалик футболчи 17,2 миллион еврога сотиб олинди.

Жорий мавсумда 27 ёшли ҳимоячи 46 та ўйинда майдонга тушиб, 6 та сариқ ва 1 та қизил карточка олди, шунингдек, 2 та гол уриб, 2 та голли узатмани амалга оширди.