«Yuventus»ning sobiq hujumchisi va afsonasi Fabrisio Ravanelli klub himoyachisi Lloyd Kellini keskin tanqid qildi. U ingliz futbolchisining o‘yin sifatlarini shubha ostiga oldi.

«U baland bo‘yli va baquvvat, lekin deyarli hech qachon bosh bilan o‘ynamaydi. Bo‘yi qariyb 2 metr bo‘lib, havodagi kurashlarda deyarli g‘alaba qozonmaydigan markaziy himoyachini umuman ko‘rmaganman. Uning o‘yinga ta’siri sezilmayapti. To‘p unga kelib tushganda, qaror qabul qilishga juda ko‘p vaqt sarflaydi. Bunday futbolchi «Yuventus»da o‘ynay olmaydi», — dedi Ravanelli Sportium platformasidagi jonli efir paytida.

Kelli 2025 yilning fevral oyidan buyon «Yuventus» sharafini himoya qilib kelmoqda. U Turin klubiga «Nyukasl»dan ijara asosida o‘tgan edi, keyinchalik futbolchi 17,2 million yevroga sotib olindi.

Joriy mavsumda 27 yoshli himoyachi 46 ta o‘yinda maydonga tushib, 6 ta sariq va 1 ta qizil kartochka oldi, shuningdek, 2 ta gol urib, 2 ta golli uzatmani amalga oshirdi.